الأضائة للنباتات

الأضاءة

الأضاءة هي اول حاجة هاتبص عليها عشان تعرف هاتحط النبات فين و بعدها هاتتعمل معاه ازاي. الأضاءة هي البتوفر صناعة الاكل للنبات و تحويل تغذية النبات لسكر و مواد تانية مسئولة عن نموه, عشان كدة لما تقل النبات بيبقي كأنه جعان عايز يكال فيبتدي يموت, و هي تاني أهم حاجة بعد الري لأن الري هو السبب الاول البيسبب في قتل النبات بشكل سريع و السبب التاني هو الاضاءة عشان في ناس كتير ميعرفوش ازاي يقدروا يوفروا احتياجات النبات من الاضاءة فبيشتروا النبات يحطوه في البيت و النبات يبتدي يموت ببطئ شديد, بعد الاصابة ما تحصل البيربي النبات ميبقاش عارف في ايه حصل أدي للنتيجة دي فايبتدي يفكر ان السبب الري و يرجع يشتري واحدة تانية و يرويها غلط بعد ما كان بيرويها صح و يتكرر الوقف تاني او يرجع لمشاكل الري و يبقي النبات مات من الري قبل الأضاءة. طبعا احنا هانركز اكتر علي الاضاءة الداخلية.
طرق قياس قوة الضوء:

تفدر عن طريق الطرق دي تحدد قوة الضوء حسب المكان العايز تحط فيه النبات و تحدد عن طريق الحساب ده النبات المناسب للمكان و الاضاءة المناسبة بكل سهولة.
وحدة شمعة قدم (شق) او Foot Candles:

شمعة القدم هي وحدة قياس شدة الضوء الساقط على سطح يساوي 1 لومن للقدم المربع. و بالوحدة دي هانقدر نقيس قوة الضوء الساقط علي النبات و الوحدة دي ممكن تتقاس ببرنامج علي الموبيل و دول أحسن 3 برامج أندرويد أنا باستخدمهم و ممكن تستكشف برامج تانية و لو الوحدة LUX تقدر تغيرها من تعديدات البرنامج لوحدة FC او Foot Candles و البرامج كل واحد ليه ميزة عن التاني و لازم تحرك الموبيل بشكل دائري لحد ما تجيب اعلي درجة لقوة الضوء من المكان البتقيس منه او علي حسب البرنامج:
en_badge_web_generic
Light Meter بيقيس بمتر عادي و سريع
en_badge_web_generic
Lux Meter (Light Meter) بيقيس بمتر و يحددلك اكبر قوة للأضاءة مع المعدل انا بأحب ده
en_badge_web_generic
LightMeter (noAds)  بيقيس بالكاميرا الأمامية و الخلفية
أستخدام اليد:

و طبعا دي مش دقيقة بس سهلة و لو مش متوفر موبيل, أنا شخصيا لما جربتها لغبطتني بس مفيش مانع انك تجربها و ممكن تبقي شاطر فيها و الطريقة هي انك تثبت ايدك علي مسافة تقدر ب30 سم عن المكان الهيبقي فيه النبات و تشوف الظل و تحدد قوة الضوء زي الصورة دي:

tmp2B4_thumb_thumb2.jpg
تعريفات الأضاءة حسب مستوي القوة:
ضوء ضعيف:

يقدر بدرجات من 50 (شق) ل150 (شق) بمعدل متوسط 75 (شق). انك تختار نبات من نباتات الاضاءة الضعيفة مش معاناها ان النبات هايديك احسن نمو في مستوي الأضاءة ده لأن النبات ممكن يعيش في المستوي ده لكن معدل النمو هايبقي ضعيف و ممكن تفقد لونها و بتحتاج ري و تسميد أقل, افضل نمو هايكون في مستوي ضوء متوسط لمستوي ضوء عالي. و احسن النباتات البتنفع في المستوي الضعيف: الأجلونيما, دراسينا جانيت, الأشعة البيضاء, كرمة المحبوب.
ضوء متوسط:

يقدر بدرجات من 150 (شق) ل300 (شق). اي نبات بيتربي في ضوء ضعيف لما يتربي في ضوء متوسط اكيد هايبقي احسن و لو اتحط قدام شباك بحري مباشرة هايبقي افضل و نموه اسرع.
ضوء عالي:

يقدر بدرجات اكتر من 300 (شق). تعريف ضوء عالي هو الشمس المفلترة بستارة و ممكن تاخد ساعة او ساعتين شمس مباشرة من جوة البيت في الجو الرطب او الاضاءة العالية في مستوي احتياج النبات مبني علي طرق القياس الفاتت و احسن مكان للضوء العالي قدام شباك قبلي او تحت اضاءة صناعية, الشمس المباشر و الحرارة العالية بتحرق الورق و بتشجع الامراض و الحشرات و بتخلي النباتات المزهرة المفروض مش بتتعرض لشمس مباشرة وردها يموت بسرعة و ده بسبب ان النباتات الداخلية معظمها نباتات استوائية و بتنمو تحت ظل اشجار و بتحب الرطوبة.
تعريفات تانية ممكن تهمك و بتتقدر بالمدة و بالقوة و تقريبا مش بنستخدمها في موسوعة النباتات:
نصف ظل:

النباتات البتتعرض للشمس المباشرة ما بين 2 ل4 ساعات في اليوم و بتكون برة بالبيت.
نصف شمس:

النباتات البتتعرض للشمس المباشرة اكتر من 4 ساعات و اقل من 6 ساعات في اليوم و مش يتستحمل شمس مباشرة طول اليوم و لازم تتعرض لجزء من الظل خلال اليوم.
الشمس المباشرة:

هي بتكون تعرض النبات للشمس مدة اكتر من 6 ساعات يوميا حسب احتياج النبات.

   وضع مراية مقابلة للشباك او مصدر الضوء ممكن يساعد في عكس الضوء علي النباتات و زيادة تركيز الأضاءة و جعل النباتات تكبر اسرع مع اضافة ديكور مميز.

مشاكل الأضاءة:

اي مشكلة في الأضاءة سواء اضاءة اقل من احتياجات النبات او زيادة عن احتياجات النبات بيبقي ليها اعراض بتبان علي النبات و لازم ناخد بالنا منها و نبتدي نتعامل مع المشكلة بتعديل مكان النبات و تحريكه لمكان افضل او اننا نستخدم فلاتر زي الستاير.
ضوء قليل:

   الزهور مش بتطلع او مش بتفتح.
    نمو ضعيف و بطئ حتي في موسم النمو.
   اوراق قديمة بتصفر او بتبهت و تقع.
   الأوراق الجديدة بتفضل صغيرة في الحجم و ساق النبات بيطول زيادة و المسافة بين الورق كبيرة و بيمط و يرتخي ناحية مصدر الضوء.
   الاوراق الملونة تفقد الوانها.

ضوء زائد:

   الأزهار بتدبل بسرعة و تقع.
   دوائر بني غامق او سودة – حروق.
   اطراف النبات بتنشف و تتحول بني لحد ما الورقة كلها تنشف و تكرمش.
   الأوراق لونها يبهت و تبقي اقل خضرة.
   الأوراق بتنام و تتدلي خصوصا لما الشمس تيجي عليها.
   الأوراق الجديدة تصبح اقل في الحجم.

بعض الأعراض بتتشابه مع بعضها بس مع الوقت هاتقدر تفرق بين الأعراض بسهولة و لو مشيت علي التعليمات الموجودة هنا و في تعليمات النبات الخاصة في موسوعة النباتات و صفحة المشاكل المجمعة المفروض ميبنش في اي اعراض من دي.
الإضاءة الصناعية:

هتناول بشكل بسيط الأضاءة الصناعية و هي توفير مصدر غير طبيعي او بمعني اصح  كهربائي لأضاءة النباتات و بتتقاس بمعدل الضوء و قوته بنفس الاساليب الفاتت و الهدف هو توفير احتياجات النبات من الاضاءة في الاماكن المش بيوصلها أضاءة طبيعية او استخدامها في أساليب الديكور او عمل مشتل داخلي مصغر.
احتياجات النباتات من الضوء الصناعي:

   ضوء أزرق: بيخلي النبات ينتج أوراق.
   ضوء أحمر: بيخلي النبات ينتج أزهار و فواكه.

دول أهم ضوئين للنبات و بيبقوا موجودين في الضوء الأبيض البتوفرهم اللمبة.
استخدامات الإضاءة الصناعية:

بعض الدول بتوفر الكهرباء بسعر قليل أو بعض الناس بتستخدم الألواح الشمسية في أنتاج الكهرباء لمشاتل مغطاه في دول المناخ بتاعها مش ملائم لانواع النباتات البيزرعوها و ناس بتحول الجراج بتاعهم للمشاتل دي, و في ناس ببساطة بتستخدم ركن في المطبخ لزراعة اعشاب و توابل و بتشتغل بلمبة -ليد- موفرة بتكون ديكور للمطبخ و في نفس الوقت بتوفر أحتياجات الطبخ, و في ناس بتستخدم الأضاءة الصناعية فقط لزراعة البذور و أنتاج الشتلات و التكاثر أو عزل النبات المصاب و علاجه, و ممكن تحط نباتات تحت أباجورة بس عشان تستغل مكان و تضيف ديكور مميز لمكان معين زي الكومدينه او تعمل حديقة مصغرة في حاجة زي حوض سمك. في ناس كمان ممكن تستخدمها مع نباتات البونساي لو مفيش اي مصدر اضاءة او البيربي ميقدرش يهتم بنباتات فقرر يقتصر التربية علي نبات واحد بس. من احسن النباتات الممكن تتربي تحت اضاءة صناعية و للديكور: الأوركيد و البونساي و البنفسج الأفريقي.

كيفية اختيار اللمبة المناسبة:
أساسيات الألوان:

لازم اللمبة المستخدمة تكون بتتكون من الضوء الأبيض و يكون متكون من ألوان الطيف كلها لتوفير احتياجات النباتات المختلفة ما عدا الضوء الاخضر مش مهم لان النبات بيعكسه و في ناس بتبقي مركزة علي هدف واحد للنبات التخضير او الأزهار فبيركبوا لمبة ليها لون أزرق او احمر و اللمبة هاتوفر ضوء زي ضوء الشمس بزبط.
sketch-1523145162164.png
معدل كيلفن:

هو المعدل البتنتجه اللمبة من قوة الضوء الطبيعي و بيبقي مكتوب علي علبة اللمبة, 3000K بيبقي كويس عشان التزهير و 10000K بيبقي كويس عشان الحدائق المصغرة, اهم واحد و الأساسي في الأستخدام هو البيكون 6500K و بيستخدم معظم الوقت و هو الاختيار الأمثل و لازم تتأكد من الرقم المكتوب علي اللمبة.
شدة الضوء:

و ده بيتحدد علي حسب النبات و احتياجاته و بيتقدر بطرق قياس قوة الضوء المكتوبة فوق ببعد و قرب النبات للمبة.
أنواع اللمبات المستخدمة:
فلورسنت:

بتتميز بدرجة الحرارة المعتدلة و لكن قوة الاضاءة بتاعتها غير مركزة و ضعيفة فلازم النبات يكون قريب من اللمبة زيادة عشان يوفر احتياجاته من الأضاءة و في اختيارات افضل.
تكاثر البذور تحت أضاءة صناعية من كشاف عالي الحرارة
تكاثر البذور تحت أضاءة صناعية من كشاف عالي الحرارة ثم يتم نقلها تحت اضاءة باردة.
لمبة LED:

علي الرغم من ان تمنها اغلي من اللمبات التانية لكن جودتها عالية و اوفر علي المدي الطويل و مش بتنتج حرارة عالية و ضوءها مركز اكتر من اللبات التانية و اقوي و هي الافضل في جميع الأستخدامات الزراعية او غيرها و في منها Spotlight كمان لللتركيز العالي للضوء.
لمبات الصوديوم:

تمنها قليل بس بتستخدم كهرباء عالية و بتنتج معدلات عالية من الحرارة و بتستخدم غالبا لزراعة البذور و بعد ما البذور تزرع و تنتج ورق بيتم نقل الشتلات تحت لمبة من النوعين التانين و بنستخدم اللمبة الكشاف او spotlight لتركيزها.
كيفية تجهيز مشتل مصغر او اضاءة داخلية مستمرة للنباتات بدون مجهود و بأقل تكلفة باستغلال مكان أو ركن غير مستغل:
الأدوات:

   لمبة -ليد- فينوس او حسب الحاجة (عدد النباتات و نوع الأستخدام و المساحة)
   دواية للمبة (او اباجورة او اي حامل لمبات)
   موقت ألي كهربائي
   سلك كهربائي للتوصيل بين الموقت و الدواية

و بعد تجهيز الأدوات و تركيبها هانمشي علي نفس التعليمات الفوق.
المدة المطلوبة لتشغيل الأضاءة حسب أحتياجات النباتات الداخلية:

النباتات بتحتاج علي الأقل 8 ساعات يوميا من الظلام فبشكل عام بنشغل الأضاءة 12 ساعة ل14 ساعة يوميا خصوصا لأن النباتات البنتكلم عليها نباتات داخلية, اما لتكاثر البذور فبتحتاج من 16 ساعة ل18 ساعة و بشكل عام لجميع الأحتياجات 12 ساعة شغالة و 12 ساعة مقفولة و ده لان في ناس بيتستخدم مشتل واحد مصغر زيي فمفيش مشكلة انك تشغله نص و نص.

بالنسبة للنباتات الخارجية البتحتاج شمس بيبقي أحتياجاتها تحت الأضاءة الصناعية للبذور و تكاثر العقل 16 ساعة او اكتر و لمرحلة نمو الأوراق 18+ ساعة شغالة و 6 ساعات مقفولة و في مرحلة التزهير 12 ساعة شغالة و 12 ساعة مقفولة.